CEBU, Philippines - Ang sayop nga paghimong basurahan sa mga kanal mao gihapon ang hinungdan sa pagbaha sa nagkalainlaing barangay sa dakbayan sa Mandaue kagahapon.
Matud pa ni Archetic Florentino Nimor, nga maoy planning officer sa maong dakbayan nga gumikan sa pagbara sa tubig sa mga kanal, miawas ang tubig sa mga kadalanan.
Bisan kadiyot ra kaayo ang ulan nga mibundak kagahapon apan wala makalikay sa baha ang nagkalain-laing lugar sa Mandaue hinungdan nga ang mga karsada niini nahisama sa sapa nga gilangoylangoyan sa mga sakyanan.
Matud pa ni Nimor nga gawas kun magtinarong ang mga molupyo sa paglabay sa ilang basura dili masulbad ang pagbaha panahon sa tinguwan ang siyudad sa Mandaue. (BANAT NEWS)