CEBU, Philippines - Ang tinun-an sa St. Theresa’s College nga usa sa 12 ka opisyal nga kandidata sa Miss Mandaue 2012 walay pagsupak sa lakang sa mga madre sa ilang tulunghaan batok sa lima ka mga tinun-an nga gidid-an sa pagpaso atol sa ilang gradwasyon niadtong Marso 30, 2012.
Gipadayag kini ni Zennybelle delos Santos, 18, nga tinun-an sa kurso nga Mass Communication sa nahisgotang tulunghaan sa press conference nga gipahigayon didto sa Montebello Villa Hotel kagahapon.
Matud pa niya nga hugtanon niyang gipaluyohan ang gihimo sa nagdumala nga mga madre nga higpit nga gidid-an ang mga tinun-an pagpasundayag sa nindot nilang mga lawas sa Facebook.
Gipasabot ni Delos Santos nga ang tinguha sa mga nagdumala sa STC mao lamang ang pagpreserbar sa ilang kaligdong ug kadungganan nga kababayen-an aron tahuron sila sa kalalakin-an. - BANAT NEWS