CEBU, Philippines - “Gidaman.” Kini ang paghulagway ni Gob. Gwendolyn Garcia ngadto ni Kong. Tomas Osmeña human namasangil nga kapin sa 200 ka dagkong kahoy ang gipangputol sa barangay Apas, dakbayan sa Sugbo.
Ang lalawigan sa Sugbo ang tag-iya sa luna diin tukoron ang P1.2 bilyones nga Ciudad Project sa nahisgutang dapit.
Gikiha ni Osmeña ngadto sa buhatan sa Ombudsman-Visayas ang kadagkoan sa Environmental Management Bureau-7 lakip na ang developer sa proyekto nga mao ang Fifth Avenue Property Development Corporation.
Si Osmeña mipasangil nga 263 ka punoan sa dagkong kahoy ang gipamutol sa developer ug 37 nalang ang gipabilin.
Kini ang nakapaaghat kang Garcia sa pagpasusi sa mga tinugyanan sa Provincial General Services Office aron pagtino sa pasangil ni Osmeña.
Ang pangulo sa PGSO nga si Bernard Calderon miingon nga hayag na unta kaayo ang dapit kung tinuod pa nga gipamutol ang kahoy sa dapit diin nahimutang ang kanhi Cebu International School.
“Mahadlok pa man ka kay mura man og daghan pa nagpuyo nga bitin,” sumala pa ni Calderon ngadto sa mga tigbalita.
Base sa ilang pakisusi, natino nga may mga pinutol nga kahoy apan ang mga residente duol sa dapit miingon nga gikan sa Cebu Country Club ang maong mga kahoy ug ilang pinalit.
Midugang si Calderon nga kung may naputol man nga kahoy sa dapit nga gitumbok ni Osmeña, usa ra ka punoan nga gituyo gumikan kay delikado na kini ngadto sa mga residente.(/EIM) (BANATNEWS)