CEBU, Philippines - Mga polis sa dakbayan sa Danao kinsa paingon nga mo-serve og warrant of arrest batok sa usa ka suspetsado sa pagpanglugos ang nakalarot hinuon og mga 3,000 ka punoan sa marijuana diha sa sitio Panilawad-an, barangay Lawaan usa ka bukirang barangay sa nahisgutang siyudad niadtong Biyernes sa buntag.
Si Regional Trial Court (RTC) Judge Meindrado Paredes sa Branch 25 sa dakbayan sa Danao maoy miisyu sa nahisgutang warrant batok sa usa ka Alberto Codillo Sr. tungod sa kasong pagpanglugos nga nahitabo niadtong Abril 30, 2011.
Si Chief Inspector Ricky Delelis, hepe sa Danao Police Station mibutyag nga ang lima ka mga polis nga gipangulohan ni SPO1 Bryan Batiquim ang nakaagi sa usa ka marijuana plantation diha sa lugar hinungdan nga ilaha nalang kining gipanglarot.
Mikabat ngadto sa 3,091 ka mga fully grown nga mga marijuana ug 300 ka marijuana seedlings ang nalarot sa grupo ni Batiquim. Ang plantasyon nahimutang upat ka kilometro pa pangadto sa balay ni Codillo maong sa ilang pag-abot wala na kini ug gituohang nakaipsot na hinungdan nga ang mga polis namalik ug gipanglarot nalang ang mga marijuana. (BANATNEWS)