CEBU, Philippines - Patay ang usa ka babayeng gwardiya samtang naangol ang bana niini human ang ilang gisakyan nga motorsiklo nabanggaan sa usa ka taksi kagahapon sa kaadlawon diha sa El Bacayo dalan V. Rama sa barangay Guadalupe siyudad sa Sugbu.
Ang biktima giila sa kapulisan nga mao si Marjorie Sabal, 35, taga barangay Sapangdako samtang ang naangol mao ang iyang banang si Donald, 36, kinsa nalandig sa tambalanan gumikan sa pagkaangol.
Si Tito Miano, 28, minyo, taga Bayanihan Village sa barangay Basak-San Nicolas ning siyudad drayber sa Saint Claire Taxi nga nagtangag sa plakang GXP-324 anaa karun gitanggong sa detention cell sa Traffic Division.
Si Manuel Tagaan sa records section sa Traffic Division nga gikahinabi sa Banat News nagkanayon nga gihatud sa bana ang iyang asawa sakay sa ilang motorsiklo paingon sa trabahoan niini sa Lex Mark sa Ayala Business Park apan pag-abot sa maong lugar nadisgrasya.
Subay sa pasiunang imbestigasyon sa Traffic Division nga paingon moliko sa wala si Miano dihang nagkasugat sila sa motorsiklo sa mga biktima hinungdan sa ilang pagkabangga ug ang magtiayon nangalagpot apan giingong naligsan ang asawa sa maong taksi.
Ang magtiayong Sabal daling gitabang ug gihatud sa tambalanan apan ang asawa walay swerte kay nakabsan kini sa iyang kinabuhi.
Si Cris Aban sa SS7 Guardforce security agency nga diin masakop si Sabal mikumpirmar nga nakadawat sila og tawag gikan sa head guard sa gitrabahoan niini nga nagpahibalong nakalas si Sabal. Ug Lesley Caminade/EIM - (BANAT NEWS)