CEBU, Philippines - Migraduwar na ang 35 ka mga tinun-an sa 1st Housekeeping National Certificate II(HNC)II nga gipasiugdahan sa Center for Health Care Professionals Cebu Inc. (CHPCI) sa dalan A.C. Cortes Avenue sa barangay Alang-Alang, dakbayan sa Mandaue.
Ang gradwasyon didto ipahigayon sa Cebu Business Hotel sa dalan Colon , dakbayan sa Sugbo sa miaging Sabado, nga gitambongan ni Susan Cueno, ang representante sa Training Education and Development Skills Administration (TESDA) nga maoy mibansay sa mga tinun-an sa CHCPCI.
Ang CHCPCI, usa ka training school sa dakbayan sa Mandaue nga akreditado sa TESDA.
Mitambong usab sa maong gradwasyon si Manlalaban James Abadia nga nagrepresentar sa buhatan ni Mandaue City Mayor Jonas Cortes ug Jessie Perez kinsa mao usab ang nagrepresentar sa buhatan ni 6th District Congressman Gabriel Luis Quisumbing.
Si Bernard Restificar nga maoy presidente ug execeutive chairman sa maong tulunghaan sa iyang mensahe, atol sa seremonyas sa graduation mipasabot nga ang maong tulunghaan nga ilang gidumala maoy dangpanan sa mga kabus kinsa human mograduwar sa high school dili makasugakod sa pagtungha sa kolehiyo kay wala nay ikagasto ang mga ginikanan.
Gitataw niya nga ang migraduwar karong tuiga mao pay unang produkto nga mga tinun-ang migraduwar sa maong tulunghaan.
Si Restificar nga nahinabi sa Banat News miingon nga ang 35 ka mga tinun-an nakapsar sa tulo ka bulan nga training aron sila makakuha og lisensiya sa NC II nga maoy gikinahanglan sa pagpangaplay nila og trabaho ngadto sa gawas sa nasud sama sa Canada, Thailand, Singapore, Uropa, Saudi Arabia, China, Hong Kong, Amerika ug uban pa.
Dugang pa niya nga ang maong mga tinun-an nga labing una nilang gradwado sa Housekeeping NC II mga molupyo sa ikaunom nga distrito sa lalawigan sa Sugbo nga nakapahimulos usab sa scholarship program ni Kongresista Luigi Quisumbing kinsa maoy nag-abaga sa galastohan sa ilang pagtungha. (BANAT NEWS)