CEBU, Philippines - Giklaro ni Kapitan Roger Resurrection sa barangay Suba nga wala siya mikuwestyon sa gipahigayong operasyon sa Philippine Drug Enforcement Agency (PDEA) sa milabay nga adlaw diin duha ka gipasanginlang big time drug pushers ang nasikop sa gihimong buy bust operation.
Si Resurrection miklaro sa Banat News nga wala siya sa maong hitabo maong nahibulong siya nganong gihinganlan siya sa tigpamaba sa PDEA nga si Jessie Tabanao.
“Nahibulong na lang ko og kalit kung nganong nadamay akong pangalan,” matud pa sa kapitan. Si Tabanao matud pang Resurrection personal niyang gibisita sa buhatan sa PDEA ug mihimakak kining si Resurrection ang iyang gipasabot.
Si Tabanao nga nahinabi sa Banat News mikorihir sa iyang unang pamahayag ug milimpyo sa pangalan ni Resurrection sanglit lain nga opisyal diay ang iyang pasabot kinsa nagpailang opisyal sa barangay ug mao karon ang ilang gipangita.
Si Resurrection nagkanayon seryuso ang ilang barangay sa pagsumpo sa ilegal nga drugas diha sa iyang dapit ug mipahimangno sa iyang mga konstituwente nga maglikay sa maong ilegal nga kalihukan.
Kahinumduman nga nasikop sa PDEA ang gipasanginlang bigtime nga pusher nga si Marcial Inso alyas ‘Lou’, 38, taga sitio Magsaysay St., sa barangay Suba.
Nakuhaan si Inso og duha ka dagkong putos sa shabu ug giingong nalakip na kini sa drug watch list sa PDEA-7 ug giisip nga level 2 pusher.
Usa ka ahente sa PDEA ang nasamdan dihang nag-people power ang mga tawo ug nanglabay’g bato, botelya ug dinamitang wala mobuto. (BANAT NEWS)