CEBU, Philippines - Patay ang usa ka batan-ong lalaki nga giingong milayat gikan sa roof top sa ikaduhang andana sa ilang panimalay diha sa Block 7, Raja Town Homes Subdivision sa sitio Dunggoan, barangay Basak, dakbayan sa Mandaue alas-9 pasado ang takna sa miaging gabii.
Ang namatay mao si Anthony Padua, 22, nagpuyo sa maong dapit ug giingong daan na nga nawad-an sa maayong pangisip sa paghiuli gikan pa sa Estados Unidos kaniadto.
Si SPO4 Rodrigo Sevillano sa kapolisan sa Presinto 3 sa Basak Police Station nga nahinabi sa Banat News miingon nga ang namatay bag-ohay palang nga gipagawas sa mental hospital.
Sumala pa ni Sevillano sayo pa sa maong adlaw namatikdan sa mga silingan nga nagpasopaso si Padua sa ilang panimalay nga nagpunay og yawyaw.
Dugang pa niya nga adunay nagbantay sa maong batan-on apan giingong nalipat kini ug mikatkat gikan sa terrace ug milahos kini sa roof top nga gibana-banang 40 ngadto sa 50 ka tiil ang gihabugon gikan sa ubos. Gikan didto sumala pa nga milayat kini paingon sa ubos ug mitugpa kini sa sementadong bahin sa ilang panimalay nga naghapa ang posisyon.
Matud pa ni Sevillano nga nagupok ang nawong sa maong batan-on ug grabeng bun-og ang naangkon sa kalawasan ug ang mga sakop sa Accident Control and Emergency Rescue Team (ACERT) sa maong dakbayan daling midala kaniya sa Mandaue City District Hospital apan gideklarar sa mga doktor nga dead on arrival.
Dugang pa ni Sevillano nga base sa iyang nahipos nga kasayuran gitabangan og kulata sa mga langyaw ang namatay nga gituohang maoy hinungdan sa kadaut sa iyang pangisip. Wala hinuoy kabanay sa namatay ang miatubang sa media. – BANAT NEWS