CEBU, Philippines - Matag 100 ka mga kwalipikadong manarbaho sa dakbayan sa Mandaue, unom lamang kanila ang maisip nga walay trabaho base sa 6.34 porsiyento nga unemployment rate niini.
Kini ang pamahayag ni Musoline Sulima, ang City Public Employment Services Office (PESO) manager dihang nahinabi sa mga tigbalita sa usa ka press conference.
Si Musoline miingon nga sa 346,745 nga gidaghanon sa mga molupyo sa dakbayan, mokabat sa 150,352 niini kanila ang nagtrabaho sa nagkadaiyang buhatan o establisamento sa dakbayan.
Gitataw niya nga labing ubos lamang kaayo ang gidaghanon sa dakbayan ang walay trabaho kun itandi sa uban nga mga dapit dinhi sa Central Visayas.
Gani gumikan sa daghang kapanarbahoan sa dakbayan nagkadaghan usab ang gikan sa laing lugar ang nanimpalad sa pagpangita og trabaho diha sa Mandaue.
Dugang pa niya nga ang ilang buhatan sa PESO usa sa nahimong dangpanan sa mga nagpangita og trabaho sanglit ang nagkalainlaing establisamento o mga kompaniya mao may mopahibalo sa ilang buhatan kun aduna kini panginahanglan nga mga trabahante.
Giangkon ni Musoline nga dili na sila manginlabot kun pila ang gihatag nga suweldo sa mga aplikante nga nadawat sa giaplayan nga trabaho tungod kay ang panagsabot bahin sa sohulan anaa lamang tali sa tagdumala ug sa hingtungdang trabahante.
Gipasabot niya nga ang ilang pagtabang sa aplikante nga modangop sa ilang buhatan mao lamang ang paghatag og giya sa pagpangita og establisamento nga nanginahanglan og trabahante ug ang paghatag og giya sa pag-apply niini. (BANATNEWS)