CEBU, Philippines - Nadakpan sa mga sakop sa Criminal Investigation and Detection Group (CIDG)-7 ang usa ka construction worker nga giingong most wanted tungod sa kasong robbery kagahapon sa buntag sa gitrabahoan niini sa San Jose Maria Village sa Ward-4 Poblacion, lungsod sa Minglanilla.
Nagtingkagol sa selda sa CIDG-7 si Roel Castañares, taga barangay Tapol, dakbayan sa Talisay ug nagtrabaho isip mason sa maong lugar.
Si Castañares gisikop ni Sr. Insp. Ricky Neron ug mga kaubanan sa CIDG-7 pinasikad sa warrant nga giisyu ni Judge Ulric Canete sa RTC Branch 55 sa Mandaue City. Gitugtan sa korte nga makapiyansa sa kantidad nga P24 mil alang sa temporaryo niining kagawasan.
Si Criminal Investigator 1 Michael Ferrolino sa CIDG-7 nga nahinabi sa Banat News mitug-an nga niadtong milabay’ng tuig gitulis ni Castañares ang iyang kanhi agalon nga si Willy Go sa barangay Tipolo, Mandaue. Mga 11 na ka tuig nagtrabaho si Castañares kang Go.
Matud ni Ferrolino nga nakuha sa suspek ang P180 mil nga gisulod sa kaha sa iyang amo nga usa ka negosyante og bag. Si Castañares nga nahinabi sa Banat News kagahapon miangkon nga iyang nabuhat ang maong salaod gumikan kay gusto niyang palitan og makina sa panahi iyang asawa kay gusto niyang papanahion. Apan matud niya P80 mil ra iyang nadala, dili P180 mil.
Matud ni Ferrolino nga nakapalit og makina nga tag-P18 mil si Castañares. Apan ang mga igsuon niini boluntaryong mitahan sa maong makina ngadto sa ilang buhatan. - BANAT NEWS