CEBU, Philippines - Higpit nga gibantayan sa kapolisan sa lungsod sa Consolacion ang lumba sa motorsiklo nga gireklamo sa mga molupyo sa barangay Pitogo tungod sa hilabihan kasaba sa panahon sa gabii.
Si PO2 Jeovani Mabano sa Consolacion Police Station nga sagad sa nangapil sa lumba sa motorsiklo mao ang pipila ka mga habalhabal drayber sa maong dapit ug grupo usab sa mga pribado nga motorista.
Matud pa ni PO2 Mabano nga paingon sa barangay Jagobiao sa dakbayan sa Mandaue ang ginukdanay sa motorsiklo nga ilang gituohan nga naglambigit kini sa pagpustaanay og salapi.Gipasabot ni PO2 Mabano nga daghan na sila og nadakpan nga motorsiklo apan ang ilang nahimo mao lamang ang pagsusi sa rehistro ug lisensiya sa drayber nga nagsakay niini.
Dugang pa nilang gihimo mao ang pagpatrolya ug ilang bantayan kun adunay magtapok nga mga motorista kinsa mabungkag lamang usab kun makamatikmod kanila nga nagpatrolya sa maong dapit.
Si Mabano miingon nga sa higayon nga makabiya na sila sa maong dapit ang maong grupo sa mga motorista ang mamalik na usab ug mamatikdan na lamang usab nila ang saba kaayong andar sa motorsiklo nga naglumba sa pagpanagan pahilayo sa nahisgotang dapit. (BANATNEWS)