CEBU, Philippines - Giatangan ug gidunggab-patay ang usa ka 38-anyos nga lalaki sa iyahang gikaaway diha sa taytayan sa barangay Cansaga sa lungsod sa Consolacion niadtong Domingo sa alas 3:00 sa hapon.
Ang biktima mao si Anastacio Rita, molupyo sa maong lugar samtang ang suspek mao si Eugene dela Cruz, wala pa matino ang pinuy-anan.
Matud ni PO2 Giovanni Babano sa Consolacion Police Station dihang nahinabi sa Banat News base sa pamahayag sa saksi nga si Junie Lara, 41, naglalis ang biktima ug suspek sa wala pa mahitabo ang pagpanunggab.Gikatahong naglawog sa mga manok igtatari ang biktima diha usab sa iyang duol ang suspek ug nagpunay sila og binayloay og mga mahait nga pulong hangtud nga milakaw ang suspek.
Apan dihang milakaw ang biktima ug pag-abot sa maong lugar wala kini makabantay nga giatangan kini sa suspek ug sa walay daghang estorya gidunggab dayun kini duha ka higayun sa ibabaw nga bahin sa tiyan ug laing samad dinunggaban sa sentro sa kuto-kuto niini.
Ang mga tawo nga nakabantay sa hitabo mao nay mitabang kang Rita paghatud sa Eversely Child Sanitarium Hospital sa Jagobiao siyudad sa Mandaue apan tungod kay delikado ang kahimtang gibalhin kini sa Vicente Sotto Memorial Medical Center (VSMMC) apan gideklarar nga dead on arrival.
Samtang ang suspek daling nakasibat human sa hitabo ug padayon pang gipangita sa kapulisan sa paghimo ning balita. (BANATNEWS)