CEBU, Philippines - Mireklamo ang parallel group sa Liberal party dinhi sa Sugbo tungod sa grabeng kalangay sa pag-transmit sa canvass result ngadto sa national server nga gigunitan sa National Board of Canvassers.
“Our Comelec here must have a strict order to delay transmission. There must be some unseen hands here,” ang tinubdan sa Liberal party nagkanayon dungan sa paghangyo nga dili lang magpaila.
Matud niini nga ang rehiyon siete, lakip na ang Sugbo, nag-una sa talaan sa labing langayan mo-transmit sa Certificate of Canvass ngadto sa kauluhan, ug ikaduha lamang ang Maguindanao.
“Dili ta magpakaulaw dinhi. We are very advance in terms of technology and yet langay kaayo atong Comelec pag-transmit.
Sumala pa niini nga sulod sa 36-oras, wala gyud mausab ang partial unofficial result nga napublikar sa pagka-presidente ug pagka-bise presidente tungod sa kalangay sa pag-transmit sa na-canvass nga balota dinhi sa rehiyon siete. Sa kinatibuk-ang resulta sa na-canvass nga balota sa lalawigan, nag-una si Noynoy Aquino nga nakakuha og 674,637 botos, nagsunod si Gilbert Teodoro nga nakakuha og 253,545, Manny Villar nga 164,144.
Sa pagka-bise presidente, nag-una si Mar Roxas nga nakakuha og 707, 364 botos, nagsunod si Jejomar Binay nga nakakuha og 304,301, Loren Legarda, 90,672.
Sa siyudad sa Sugbo, sa pagka-presidente si Aquino nakakuha og 488,086 botos, nagsunod si Teodoro, 133,907 ug Villar, 93, 958. Sa pagka-bise presidente, nag-una si Roxas nga nakakuha og 517,774 botos, nagsunod si Binay, 186,885, Legarda, 40, 539.
Sa pagka-senador, nag-una gihapon si Sergio Osmeña III nga nakakuha og 249,288. Gisundan kini ni Franklin Drilon, 223,277; Miriam Defensor, 196,611; Ramon Revilla, 186,744; Ralph Recto, 182,651; Pia Cayetano, 169,438; Risa Hontiveros, 160,892; Juan Ponce Enrile, 158,281; Teofisto Guingona III, 155,234; Emilio Mario Osmeña, 152,875; Vicente Sotto III, 144,243; Ruffy Biazon, 127, 993; Jinggoy Estrada, 126,464; Sonia Roco, 115,743; Neric Acosta, 112,455. – BANAT NEWS