CEBU, Philippines - Giawhag ni Cebu Provincial Police Director Senior Superintendent Erson Digal ang mga kandidato sa mga lungsod ug siyudad nga giisip nga election hot spot (EHS) nga magpinirmahay sila og peace covenant.
Matud pa ni Digal nga ang mga kandidato sa lungsod sa Tabuelan nga usa sa mga EHS sa Mayo 10 nga piniliay maoy labing una nga nagpinirmahay niadtong miaging adlaw.
Gipasabot ni Digal nga ang pagpinirmahay sa mga kandidato sa usa ka peace covenant maoy pagpakita nila sa dakong tinguha nga magmalinawon ang ilang lugar sa adlaw sa election.
Sa nasayran nga mokabat sa 11 ka mga lungsod ug duha ka mga dakbayan dinhi sa Sugbo nga naglakip sa dakbayan sa Naga ug dakbayan sa Bogo ang nahimong EHS karon.
Si Comelec Provincial Supervisor Lionel Marco Castillano mibutyag sa Banat News nga ang pagbutang sa usa ka lugar nga EHS, gibase sa kagubot politikanhon nga nahitabo sa maong dapit niadtong milabay nga election. (BANATNEWS)