CEBU, Philippines - Unom na ka mga tawo sa dakbayan sa Sugbo ang nataptan og Human Immunodeficiency Syndrome-Acquired Immunodeficiency Syndrome (HIV-AIDS) niining tuiga.
Kini maoy gibutyag ni Dr. Ilya Abellanosa Tac-an, ang labaw sa STD/HIV/AIDS sa City Health Department.
Matud ni Tac-an nga ang mga biktima naglangkob sa upat ka mga lalaki ug duha ka mga babaye diin usa niini ang nagpakita na og sintomas sa AIDS.
Upat sa mga biktima nataptan og AIDS tungod sa pagpakighilawas sa lain-laing partner samtang ang duha nigamit ug usa lang ka dagom sa injection.
Sa kinatibuk-an, ang dakbayan duna nay 95 ka kaso sa HIV/AIDS sukad gisugdan sa City Health ang monitoring niadtong 1989.
Naalarma na si Tac-an sa maong mga kaso tungod kay kini giingong nagkadaghan ug dunay mataptan niini matag tuig.
Tambag ni Doctor Tac-an ngadto sa mga Sugbuanon nga magmatngon aron malikayan ang nahisgutang makamatay nga sakit.
“Tulo ra man gyud ka paagi nga makatakod ang HIV/AIDS diin ang sagad niini through sexual transmission, so, likayan na lang gyud sa mga batan-on nga makipag-sex unya kadtong mga minyo, faithful lang gyud sa asawa,” sumala ni Tac-an. – BANAT NEWS