CEBU, Philippines - Niminus ang gidaghanon sa mga hayop partikular na sa baboy nga gipaihaw diha sa Cebu City Modern Abattoir (CCMA) niining buwana itandi sa miaging tuig.
Kini maoy giangkon sa nagdumala sa ihawan nga si Doctor Alice Utlang, ang labaw sa Department of Veterinary Medicine and Fisheries (DVMF).
Giklaro hinuon ni Utlang nga dili kaayo dako ang deperensya sa gidaghanon apan kini giingong nakapaminus usab sa income sa ihawan. Gibutyag ni Utlang nga sa miaging tuig, ang abattoir nakaihaw og dul-an sa 7,800 ka mga baboy sa buwan lang sa Nobiyembre apan karon mokapin na lang sa 7, 200 ka mga baboy ang naihaw niining buwana.
Nagtuo si Utlang nga ang pagtumod sa ubang mga hayop ngadto sa kauluhan maoy nag-unang hinungdan nga niminus ang nagpaihaw sa CCMA.
Kini human usab masinati sa Luzon ang bagyong Pepeng ug Ondoy nga wala lang nibanlas sa mga kabalayan ug kabtangan lakip na sa kahayupan.
Malaumon hinuon si Utlang nga sa sunod buwan, musaka ang gidaghanon sa mga hayop nga ipaihaw sa abattoir tungod usab sa Christmas season.
Sa pikas bahin, gitambagan ni Utlang ang magpaihaw sa ilang hayop nga mopahibawo sa iyang mga tawo sa dili pa kini ipakanaug sa sakyanan aron matabangan ang mga tawo niini sa iyang mga sakop, aron dili na masubli ang pag-ikyas sa hayop gikan sa mga nagdala niini.
Niadtong miaging gabii, usa ka baka nga ipaihaw unta diha sa abattoir ang nakabuhi ug nidagan ug nakasungag ug nakaangol og lima ka tawo nga nalabyan sa pagdagan-dagan niini sa uptown area hinungdan nga kini gipusil sa mga polis. - BANAT NEWS