CEBU, Philippines - Usa ka inahan mireklamo human gipasagdan lang ang iyang 12-anyos nga anak nga nagtungha sa Grade 5 sa Talamban Elementary School human wala tabangi sa maestra niini sa dihang nahagbong gikan sa ikatulong andana sa tunghaan kagahapon sa alas 12 sa udto.
Ang inahan nga si Remelita Comedido, 42, taga sitio Ylaya, barangay Talamban mireklamo batok sa adviser sa iyang anak nga si Gng. Lea Leyson human ang iyang anak nga si Junmark wala ubani sa barangay health center human makuyapi sa iyang pagkahagbong.
Matud pa niini nga ang mga kaubanan na lang sa iyang anak maoy nagdala sa health center ug diha pa miadto si Gng. Leyson sa dihang gipatawag sa wala pa gibalhin ang iyang anak sa Cebu City Medical Center.
Si Junmark, gikatahong nag-ambak-ambak sa hagdanan apan naligas kini ug nabalitok sa railing ug natagak. Nasangit unta kini sa railing sa 2nd floor, apan milahos og katagak sa ground floor ug nakuyapan.
Nakaangkon kini og kadaot sa iyang kalawasan ug natangtangan sa iyang usa ka ngipon, nasamad ang ilawom sa suwang, ingon man bukol sa ulo. Nagpaalim kini sa CCMC karon.
Apan nasagmuyo si Comedido tungod kay giingnan lang siya ni Leyson nga walay responsibilidad ug walay matabang ang tunghaan sa gidangatan sa iyang anak.
Giingong nangatarungan si Leyson nga wala nay klase niadtong higayona tungod kay oras sa tingpaniudto hinungdan nga walay tulubagon ang tunghaan.
Samtang nasagmuyo usab si Comedido human mipadayag ang magtutudlo sa iyang anak nga walay matabang ang tunghaan tungod kay ang iyang anak wala makabayad sa Boy Scout of the Philippines fee ug sa insurance niini.
“Nihangyo lang unta ko niya kay wala intawon koy kwarta bag-ohay pang nakagawas ang akong usang anak sa tambalanan samtang ang akong bana trisikad driver lang,” sumala pa ni Comedido.
Dugang pa niini nga moreklamo gyud siya batok ni Leyson ingon man sa school principal nga si Gng. Anita Rodriguez tungod kay ang iyang tumong igo lang sa pagpangayo og tabang apan wala siya tagda.
Samtang si Dr. Recarido Borgonia, acting regional director sa Department of Education nga gikahinabi sa Banat News nagkanayon nga iyang ipa-imbestigar ang mga magtutudlo nga responsable sa panghitabo.
Ang Banat News misuway pagkuha sa habig sa prinsipal nga si Rodriguez apan wala kini sa buhatan tungod kay dunay gitambongang seminar, samtang ang magtutudlo nga si Leyson dili usab motubag kay nagpahigayon og periodical test. – BANAT NEWS