CEBU, Philippines - Ang mga opisyales sa ALU-TUCP subling miawhag sa Maritime Industry Authority kon (Marina) nga libkason na ang suspension sa operation sa mga barko sa Sulpicio Lines Inc.
Kini aron makabalik na sa ilang tagsatagsa ka mga trabaho ang mga trabahante sa maong shipping companies nga mga miyembro sa ALU kinsa nawad-an usab og mga asawa.
Gipahibalo ni Genaro Basan, presidente sa unyon nga 25 porsiyento sa kapin sa 800 ka mga trabahanteng ilang sakop nga wala na makatrabaho ang gipangbiyaan na sa ilang mga asawa.
Matud pa ni Basan nga mas modaghan pa ang mga pamilyang mabungkag gumikan kay wala nay ikabuhi ang maong mga trabahante.
Si ALU-TUCP partylist representative Raymund Mendoza mopasar og resolusyon sa Ubos Balay Balauranan aron subli nilang aghaton ang MARINA sa paglibkas na sa kapin sa usa ka tuig nga suspension sa Sulpicio Lines Inc.
Matud pa ni Mendoza nga igo na kaayo ang usa ka tuig nga suspension tungod kay naapektuhan na pag-ayo ang natad sa patigayon ug ang mga trabahante nga nagsalig sa maong shipping company.
Dugang pa ni Mendoza nga mas molapad pa unya ang maong problema tungod kay niabot na og 90 porsiyento sa mga anak sa mga empleyado sa Sulpicio nga nawad-a'g trabaho, wala na sad makatungha og balik. – BANAT NEWS