CEBU, Philippines - Samaran ang usa ka langyaw sa dihang gipusil kini sa usa ka tawo nga nagmaskara didto sa Sitio Atabay, barangay Agus, dakbayan sa Lapulapu sa milabay’ng gabii.
Ang langyaw giila nga si Peter Dameester Vercruysse, 41, ulitawo, usa ka Belgian national ug temporaryong nagpuyo uban sa iyang kapuyo sa Sitio Bagong Bayan barangay Maribago dakbayan sa Lapulapu.
Base sa pasiunang imbestigasyon ni SPO1 Jack Inihaw sa Crime Against Persons sa Lapulapu nasayran nga samtang naglakaw kini sa maong dapit kuyog ang iyang bag-ong kapuyo nga si Judith Suscanon lumad sa Agusan del Norte, usa ka tawo nga luwan sa usa ka motorsiklo miduol kanila dayong pamusil ngadto sa langyaw.
Ang namusil nagsul-ob og camouflage nga maskara ug armado og kalibre 45 nga pistola.
Gidali og dala sa Mactan Doctor’s Hospital si Vercruysse ug ubos kini sa obserbasyon sa mga doktor human maigo sa iyang tuong dughan milapos ang bala.
Ang biktima nga nahinabi ni SPO1 Inihaw mipadayag nga wala siya’y laing gidudahan sa maong pagpamusil gawas lamang sa iyang kanhi kapuyo sulod sa tulo ug tunga ka tuig diin iya kining gibiyaan uban sa ilang usa ka anak ug nakigpuyo siya og laing babaye.
Ang kapolisan sa dakbayan sa Lapulapu padayong nagsubay sa mga kalambuan niining mga alegasyon sa langyaw ug gani nagplano si SPO1 Inihaw nga imbitahon ang kanhi kapuyo niini alang sa paghatag usab og habig niini. – BANAT NEWS