CEBU, Philippines – Kinatawo sa usa ka 13-anyos napusilan sa usa ka sakop sa Barangay Public Safety Officer kon BPSO (barangay tanod) samtang nangihi sa bungbong diha sa sitio Abuno sa barangay Pajac dakbayan sa Lapulapu sa milabay'ng gabii.
Ang biktima tinun-an sa grade 3 ug residente sa maong dapit samtang ang gitumbok nga nakapusil kaniya mao si Roger Igot Taghoy, 33, ug residente sa maong dapit ug barangay tanod sa maong barangay.
Base sa imbestigasyon ni SPO1 Frederick Eslit sa Crime Against Persons sa Lapulapu nasayran nga nangihi ang bata nianang tungura dihang giduol ni Taghoy ug gibadlong.
Sanglit wala man dayon mohunong ang bata sa iyang gibuhat mibunot sa iyang giluklok nga armas ang suspek dayong gipanghadlok kini ngadto sa bata pinaagi sa pagkasa, apan wala damhang nakablitan niya kini samtang nag-atubang sa bata.
Ang bata naigo diha sa iyang kinatawo ug ang bala milapos diha sa paa, human niini gitabang ang bata pagdala ngadto sa Lapulapu City Hospital samtang si Taghoy daling mitahan ngadto sa barangay hall.
Gikuha siya sa mga polis ug gitanggong aron pasakaan og kaso sa pagpusil niini sa bata ug kung di siya makapakita og papeles sa iyang armas dugang kaso na usab ang iyang atubangon. – BANAT NEWS