CEBU, Philippines – Tulo ka tawo ang nadakpan sa kapolisan sa akto nga nangawat sa mga kable sa Globe Telecom didto sa Sitio Bakay, barangay Tulay, lungsod sa Minglanilla kagahapon sa alas 3:00 sa kaadlawon.
Ang mga nadakpan mao sila si Wilson Abalo, 21, ulitawo, taga Cansojong siyudad sa Talisay, Renan Cabigon, 19, minyo, taga Inayawan siyudad sa Sugbo ug Ricky Yares, 33, minyo, taga Tabunok siyudad sa Talisay.
Si PO3 Rolland Camillo sa Minglanilla Police Station mibutyag sa Banat News nga ang mga suspek nagtinabangay sa pagpamutol sa gibana-banang 400 ka parisan sa kable sa Globe Telecom nga may 50 metros kapin ang gitas-on ug mokantidad og P85 mil.
Igo gyung nahuman sa mga suspek ang pagsunog sa maong mga kable ug nanghipos na sa mga bronze niini dihang nahiabot ang kapolisan ug miposas kanila.
Ang hepe sa Task Force Bantay Cable sa Globe Telecom nga si Gerald Pecheyda miadto dayon sa buhatan sa kapolisan aron sugdan ang paghikay sa kasong isang-at batok sa mga suspetsado.
Gibutyag ni Pecheyda sa Banat News nga may dili mominus 200 ka mga subscriber nila sa telepono sa maong lungsod ang apektado tungod sa gipangawat nga mga kable. - Darrel A. Carumba (BANAT NEWS)