CEBU, Philippines – Arestado ang tulo ka mga suspetsado sa pagpanglabni dihang nadakpan kini sa mga barangay tanod kay nanglabni sa bag sa usa ka estudyante didto sa barangay Lipata, lungsod sa Minglanilla kagahapon.
Ang biktima mao si Michiko Liao, hingkod, usa ka estudyante nga taga barangay Tunghaan, Minglanilla, samtang ang mga suspetsado nailhan usab nga sili si Alberto Onipa Jr., 23, nga taga Quiot, Pardo ning syudad sa Sugbo, Christian Ramos, 20, ug Rodrigo Babatid, 19 , mga ulitawo, nga taga Brgy. Lipata, Minglanilla.
Matud pa sa biktima, nga nagsakay siya og multicab sa iyang pagpauli paingon ngadto sa Minglanilla gikan sa iyang klase sa dakbayan sa Sugbu dihang mipara sa iyang gisakyan ang mga suspetsado didto sa barangay Bulacao, dakbayan sa Sugbo.
Apan sa pag-abot niini didto sa barangay Lipata, Minglanilla, ming-una og kanaog sila si Onipa ug Babatid, ug misunod dayon si Ramos kinsa mikalit og labni sa bag ni Liao nga adunay sulod nga 400 cash, cell phone, palm top, ug school ID.
Ang biktima kinsa nahadlok paggukod sa mga suspetsado nangayo og panabang sa mga barangay tanod sa Lipata .
Ang mga tanod nga abtik kaayo dali kaayong nakagukod sa mga suspetsado hangtod nga kini nadakpan.
Sa pagkakaron nagpahayahay na sila sa prisohan sa Minglanilla samtang gipaabot nga isang-at ang kasong pagpanglabni batok kanila. - Lovers Lyn Yangyang (BANAT NEWS)