CEBU, Philippines - Gilig-on sa konseho sa dakbayan sa Mandaue ang usa ka ordinansa nga nagmando sa tanang establisamento pagbutang og espesyal nga agianan alang sa mga senior citizen o mga tiguwang ug mga inutil sa mga edipisyo, terminal ug uban pang suroyanan sa tanang may apan sa panglawas.
Si Bise Mayor Carlo Fortuna mibutyag sa Banat News nga naluoy sila sa mga tiguwang ug sa mga inutil nga maglisod pagkatkat sa mga hagdanan sa mga dagkong edipisyo, sama sa mga kan-anan, hotel, pension house, terminal, shopping mall ug uban pang transaksyonanan sa publiko hinungdan nga napanday nila ang maong ordinansa.
Diha sa maong ordinansa, gimandoan gyud ang tanang establisamento nga magbutang og kaagian sa wheelchair sa mga tiguwang ug sa may kakulian sa lawas.
Gani kutob sa dili motuman ning maong balaud, kapahamtangan na og silot nga P1,000 ngadto sa P3,000, matud pa ni Fortuna.
Dihang giestukadahan kining maong ordinansa sa konseho, dali ra kaayong nauyonan sa tanan dihang giplastar daan ang mga disbintaha alang sa mga tawong may apan sa panglawas lakip na ang mga tiguwang diha sa mga edipisyo nga walay sak-anan o agianan nga gigahin alang kanila.
Midugang si Fortuna nga ang hagdan nga may ang-ang maayo lang sa mga lagsik ug walay apan sa panglawas, apan ang mga tiguwang ug kadtong mga bakol, piang, ug uban pa, maglisod na sa pagkatkat sa hagdan nga may ang-ang, busa gikinahanglan kaayo ang usa ka espesyal nga agianan alang kanila.
Miingon si Fortuna nga pagkabasa ni Mayor Jonas Cortes sa maong ordinansa puwerting dalia mipirma niini tungod kay natan-aw niya ang kamahinungdanon sa maong balaud. (Romeo T. Limpangog) (BANAT NEWS)