CEBU, Philippines - Patay ang usa sa mga nasunogan sulod sa ilang panimalay diha sa sitio Naba sa Alaska-Mambaling kagahapon pasado alas 10 sa buntag human kini pusila sa wala mailhing tawo.
Ang biktima nga si Ronilo Ortiz, 32, nakit-an pa sa mga silingan nga padulong maniudto sa ilang panimalay ug pagsulod niini sa balay nadunggan nalang nila ang buto sa armas.
Sa pagsusi sa mga silingan mao nalay ilang nakit-an si Ortiz nga nagbuy-od sa salog ug nagkadugo wala na maglihok, walay bisan usa ka silingan ang nakatumbok kun si kinsa ang mamumuno.
Sa pagsusi sa kapolisan duna kini samad pinusilan sa tuong bahin sa nawong nga gituohang hinungdan sa hinanali niining kamatayon.
Matod pa ni SPO1 Jay Yballe sa Banat News nga ilang gitan-aw ang motibong pagpanimalos tungod kay ang amahan sa biktima nga si Jose Ortiz mibutyag sa kapolisan nga nakadunggab ang iyang anak kaniadto. - Lesley Caminade (BANAT NEWS)