CEBU - Mokabat sa P800 mil ang danyos sa sunog kagahapon sa alas 5 pasado sa kaadlawon human hingpit nga naugdaw ang bodega sa Anoco Chemicals nga nahimutang sa Rizal Extension barangay San Nicolas ning dakbayan.
Si Cebu City fire marshal Esmael Codilla niisa sa maong sunog sa general alarm gumikan sa kasikbit nga residential area ug ang kapeligro sa mga naa sa sulod sa maong bodega.
Ang kabumberuhan bisan sa kalisod sa sitwasyon nakontrolar ang sunog sulod sa 37 minutos.
Ang Anoco Chemicals gipanag-iya sa usa ka Jose Uy, hingkod ang panuigon, taga Banawa, barangay Guadalupe ning dakbayan.
Hinuon way bisan usa nga naangol sa maong sunog ug wala makakatap sa kasikbit nga kabalayan.
Sa report sa dySS Super Radio gikataho sa mga residente sa nahisgutang lugar nga duna sila’y nabating sipang mga buto sulod sa maong bodega una pa mahitabo ang sunog.
Nasuta nga pulos flammable ang sulod sa maong bodega sama sa thinner, ug uban pa.
Hinuon ang tag-iya nga si Uy ang nagdumili sa pagluwat og pamahayag labot na sa maong sunog.
Apan nasayran sa Banat News nga taud-taod nang gi-petisyonan sa mga residente ang bodega ni Uy ug gikatahong ang petisyon naabot na sa buhatan sa Department of Environment and Natural Resources (DENR).
Wala hinuon makakuha ang Banat News sa kopya sa maong petisyon kung unsay rason nga ilaha kining gi-petisyunan. (BANAT NEWS)