Usa sa upat ka mga security guard nga suspek sa pagtulis sa Neo-Neo Grill Restaurant nagmahay sa iyang gibuhat.
Si Gregorio Namanas, kinsa nadakpang nang-hostage human ma-corner sa miaging gabii diha sa may dalan Dela Montaña barangay Mabolo ning dakbayan nagkanayon nga dako ang iyang pagmahay ug mibasol sa laing suspek nga maoy iyang gisumbong nga mastermind.
Ang gitumbok ni Namanas mao si Anecito Santander nga giingong maoy niagni kaniya nga ilang tulison ang maong restaurant.
Si Namanas mihangyo sa kapulisan ingon man ni Ginang Jovita Lazarte nga iyang gi-hostage nga pasayloon sa iyang nahimo gumikan kay nagipit lamang siya sa panahon ug sa kuwarta.
Matud pa ni Namanas si Santander gyud maoy utok sa tulis ug milanat og usa ka semana ang plano niini uban kang Rey Adlawan nga kanhi guwardiya sa maong kan-anan.
Samtang ang hepe sa Criminal Investigation and Intelligence Branch (CIIB) Sr. Inspector George Ylanan nibutyag nga ilang himuon nga state witness si Adlawan, apan ila karong iapil sa pagpasaka sa kasong pagpanulis.
Nasayran nga si Namanas nadakpan human mang-hostage samtang si Adlawan nadakpan sa gihimong follow-up operation, gipangita pa usab ang duha pa ka suspek nga sila si Rodello Namanas ug Anecito Santander kinsa maoy nakadala sa P69 mil ka pesos.
Si Rodello gikatahong usa usab ka guwardiya ug maoy tag-iya sa armas nga ilang gigamit sa pagpanulis samtang si Anecito Santander nakaeskapo.