Nabalaka si Mayor Tomas Osmeña sa subling paglawig sa mga barko sa Sulpicio Lines Inc. tungod sa paghatag og pagtugot sa Maritime Industry Authority (MARINA).
Ang Marina mitugot sa M/V Princess of the Earth ug M/V Cotabato Princess nga subling makabiyahe human usab makapasar sa gipahigayong re-audit sa Marina ug nakorihian ang pipila ka giingong ginagmay nga mga kakuwangan niini.
Apan taliwa sa maong kalambuan dili gihapon kumbinsido ang mayor nga luwas sakyan sa mga pasahero ang mga barko sa Sulpicio Lines.
“I’m not an expert in marine safety but we don’t need to be an expert of marine safety to know that Sulpicio is dangerous,” sumala sa mayor. “I heard something that violations are corrected, what are these violations and why they exist in the first place? What changes are being done to Sulpicio to make it safer than what it was before? Simple lang kaayo ang akong mga pangutana, dili man ko satisfied being inspected and violations are corrected,” dugang pamahayag ni Osmeña.
Wala na hinooy plano ang mayor pagpugong sa mga barko sa Sulpicio nga makalawig human kini makakuha og clearance.
Tungod niini si Osmeña nitambag na lang sa gustong mosakay sa mga barko sa Sulpicio nga magmabinantayon ug mitambag nga di nalang modayon og biyahe basta di maayo ang panahon.
Kini aron paglikay sa nahitabo sa M/V Princess of the Stars nga nikalas og ubay-ubayng kinabuhi ug gatusan pa ang nagpabiling missing human malunod.
Ang subling paglawig sa maong mga barko gikalipay hinuon og dako sa mga tripulante ug empleyado sa SLI kinsa nangataktak dili palang dugay ug gipasaligang pabalikon sa ilang mga naandang trabaho.