Pasyenteng bayot nga gibugal-bugalan sa mga medical personnel sa Vicente Sotto Memorial Medical Center nangayo og P6 milyones nga danyos sa kihang ilang gisang-at ngadto sa buhatan sa Ombudsman for the Visayas.
Sa report sa TV Patrol Central Visayas kagahapon misang-at na og supplemental complaint affidavit ang biktimang si Jan-jan batok sa mga medical personnel sa VSMMC.
Gikatahong usa ka milyon sa moral damages tungod sa kauwawan sa pamilya ni Janjan ang gipangayo ug P5 milyones usab alang sa exemplary damages gumikan sa eskandalo.
Ang reklamo nagsumikad gumikan sa pagkatap sa mga phone videos ug sa pag-upload sa You Tube sa operasyon nga nahitabo niadtong bulan sa Enero diin gikuha ang usa ka ‘Black Suede’nga body spray canister diha sa agianan sa hugaw ni Jan-jan.
Matud pa niini sa unang pamahayag diha palang sa pag-diagnose kaniya ug sa pag- Xray nauwawan na siya pag-ayo gumikan sa pagbugal-bugal sa mga medical staff ug nasamutan pa gyud kini dihang gioperahan siya nga walay panimuot ug gikuhaan og video.
Ang VSMMC mihimo na og imbestigasyon sa maong hitabo ug gipasa na ngadto sa buhatan sa Department of Health. Si DOH Secretary Francisco Duque mihingalan sa mga doktor ug nurses nga mao sila si Dr. Philips Leo Arias nga maoy head surgeon; Dr. Angelo Linawagan ang assistant surgeon; Dr. Max Joseph Montecillo; nurses nga sila si Rosemarie Villareal ug Carmina Sapio.
Ang paggula sa maong video footage gikabalak-an sa ubang sektor nga makaapekto unya sa kaugmaon sa ubang Pilipinong mga medical professionals sa ila unyang pagpanarbaho ngadto sa ubang nasud.
Gawas sa kasong kriminal gikatakdang mosang-at og reklamong administratiba ngadto sa Professional Regulatory Commission ang kahugpungan sa gay community aron pagpahamtang og silot sa mga nalambigit.
Si Atty. Guiller Ceniza ang abogado ni Jan-jan mipadayag usab sa iyang kasagmuyo sa gibuhiang pamahayag ni Msgr. Achilles Dakay nga mibasol na hinuon sa iyang kliyente sa nahitabo gumikan sa pagkabayot niini.
Si Ceniza nagkanayon nga sa pagpasok pa lang sa maong butang sa agianan sa hugaw sa iyang kliyente pag-abuso na kadto ug ang gibuhat sa mga medical staff ikaduha kining pag-abuso.
Giklaro niya nga pribadong buhat ang gihimo sa iyang kliyente, gisumbalik ni Ceniza si Dakay sa pag-ingon kun duna bay kalainan unya sa pamahayag niini kung nahitabo nga dili bayot ang iyang kliyente.