Gisaway ni Mayor Tomas Osmeña ang Integrated Bar of the Philippines (IBP) sa Sugbu nunot sa kamatayon sa usa ka nursing student niadtong miaging semana tungod kay giingong labihang hiluma sa mga sakop niini, ug wala muluwat og bisan unsang mensahe nga magsimpatiya sa pamilya sa biktima.
Ang gipasabot ni Osmeña nga nursing student mao si Ruby Jade Ruba nga gitulis ug gipatay sa mga suspetsado diha sa dalan Governor Roa barangay Capitol Site ning siyudad.
Matud sa mayor nga kung ang suspetsadong kriminal na ang madakpan o mapusilan ug mamatay, giingong labihan nga makatiyabaw ang mga sakop sa IBP.
“When a policeman gets killed in the line of duty, the IBP says nothing, when a girl was mercilessly slaughtered, the IBP says nothing, when a suspected criminal gets killed, they screamed like hell, they screamed like it’s the most heinous crime ever committed in the City,” sumala ni Osmeña.
Partikular nga gihinganlan sa mayor mao sila si Atty. Gloria Lastimosa Dalawampu ug Attorney Democrito Barcenas nga kusganong misaway kaniadto sa vigilante killings sa siyudad.
“Where’s the tears from Dalawampu, Barcenas and all those people who are so self righteous and morally upright using their moral ascendancy against the mayor,” matod ni Osmeña.
“And now that we apprehended some suspects on the killing of this young lady, sure they say, here’s another costumer for us, happy days are here again,” dugang pamahayag sa mayor.
Gani nagduda si Osmeña nga nabahinan ang mga sakop sa IBP sa halin sa cellphone nga gitulis sa mga suspetsado gikan sa babayeng tinun-an.
“There’s even a possibility that they might be paid for the proceeds of the cellphone that stolen from her, possibility lang kay basin ma-libel pa ko,” nagkanayon si Osmeña.
Sa pikas bahin, gipadayag sa mayor nga dugang benefits ang madawat sa kapulisan nga nakasikop sa mga suspetsadong mitulis ug mipatay sa nursing student.
Nagdumili hinuon pagbutyag si Osmeña kun unsa nga mga benepisyo, apan iyang gitataw nga sigurado na nga ihatag ang iyang gipasalig nga P30 mil nga cash reward.
Subay niini, miingon ang mayor, nga padayon niyang suportahan ang kapulisan sa dakbayan sukwahi sa giluwatang opinyon sa uban.