Ang gitulis giilang si Adrian Chop-ag,26, residente sa Jacinta Pension House sa barangay Capitol Site ning dakbayan.
Sumala pang PO1 Emma Caminade sa Fuente Police Station kasamtangang naglakaw si Chop-ag sa nahisgutang dapit padulong sa balay sa iyang higala dihang giatangan sa upat ka wala mailhing mga lalaki.
Ang mga suspek giingong kalit nga mideklarar og tulis ngadto kaniya ug gumikan siya nag-inusara raman wala na mosukol ang biktima dihang gidala siya sa mga tulisan sa ngitngit nga bahin sa maong dapit ug gikuha ang iyang sling bag ug relo de pulso.
Sulod sa iyang sling bag mao ang mahalong cellphone nga nagbalor og P12 mil; pitakang may sulod nga P1,500; ug mga ID.
Ang mga tulisan dali dayong milakaw palayo sa dapit samtang ang biktima nagdaling nakaadto sa buhatan sa kapolisan aron pagtug-an sa insidente.
Ang Cebu City Police Office molusad karong gabhiuna sa Nightwatch Foot Patrol sa mga crime prone areas sa dakbayan aron mabantayan ang mga dapit nga mingaw.
Si CCPO director, Sr.Supt. Patrociño Comendador nagkanayon nga tuyo sa maong patrolya nga makober ang mga dapit nga di na kaayo mapatrolyahan sa mga police station panahon sa kagabhion sanglit sagad mahitabo ang mga pagpanulis niining mga dapita.
Ang night patrol langkuban sa mga sakop sa Operations Section, Service Security Group ug pipila ka mga sakop sa Administration Branch sa CCPO nga nadestino sa mga opisina.