Anak sa konsehal nakadasmag-patay

Namatay ang usa ka tawo human ang motorsiklo niining giluwanan kalit lang nakigsungag sa Toyota van type nga sakyanan nga gimaneho sa anak sa konsehal sa dakbayan sa Mandaue.

Ang aksidente nahitabo sa dalan M.L. Quezon sa barangay Ibo, dakbayan sa Lapulapu alas 4:30 ang takna sa miaging Sabado sa kaadlawon.

Giila ni PO3 Danilo Aying sa traffic section ang biktima nga mao si Elwindy Catampo Alvarez, 22 anyos, ulitawo nga taga sitio Ibabao, barangay Mactan.

Gimaneho ni Raul Flores Cabahug III, 29 anyos, minyo, anak ni Konsehal Raul Pokang Cabahug ug Barangay Kapitan Editha Flores Cabahug sa Looc, dakbayan sa Mandaue ang gikasungag nga sakyanan sa motorsiklo sa biktima.

Sa imbestigasyon ni PO3 Rogelio Nalzaro sa traffic section sa Lapulapu Police Station, nasayran nga gikan pa sa ilang panimalay ang biktima nga nagsakay sa motorsiklo.

Nagdagan kini subay sa dalan M.L. Quezon ug nagpaingon sa barangay Pusok ug sa paghidangat sa atubangan sa barangay hall sa barangay Ibo, kalit nga gikasungag ang sakyanan ni Cabahug kinsa gikan pa usab sa ilang panimalay sa Mandaue.

Gumikan sa kusog nga impact sa panagsungag sa duha ka sakyanan, ang biktima nalagpot nga maoy nakaingon sa dakong kadaut sa iyang kalawasan ug namatay.

Si PO3 Aying miingon nga si Cabahug mitahan kang PO3 Nalzaro ug temporaryo kining gitanggong sa ilang detention cell alang sa tukmang lakang nga pagahimoon.