Ang maong putos nga plastik nakit-an sa mga tawo diha sa dakong krus sa maong sam-ang, dangtan pila ka minutos wala gihapoy nikuha niini hinungdan nga gitug-an kini ngadto sa police action center sa ganghaan sa maong sam-ang.
Ang mga polis nga nadestino didto mao nay mitawag sa Explosive and Ordnance Division sa Special Weapons and Tactics (SWAT) ug gimando dayon ngadto sa mga tawo sa pagpalayo sa maong butang.
Ang grupo sa SWAT pinanguluhan ni Chief Inspector Arnel Banzon hinay-hinay nga mihiling sa maong plastik apan nasurpresa ang mga polis dihang imbes mga wire, eksplosibo ug baterya ang makita sa sulod, humba nga baboy diay kini.
Si Supt. Pablo Labra mitug-an sa Banat News nga bisan "false alarm" kini, nagpakita kini nga alerto na karon ang mga tawo sa mga kadudahang butang nga ilang makita sa palibot.
"It is very good that the people are vigilant enough sa panahon karon," asoy pang Labra.
Ang mga tawo ug mga polis nahikatawa nalang sa maong insidente.- Edwin Ian Melecio