Kini human giasikaso na karon sa mga tinugyanan sa City Hall ang mga rekisitos aron ma-release na ang maong gisaad nga ganti sa mayor ngadto kang SPO1 Meliton Agadier.
Gawas niini, duna na usay tawo nga napilian ang mayor aron maoy iyang tahasan alang sa pag-asikaso aron maduso na sa PNP ang rekomendasyon ni Osmeña alang sa promosyon ni SPO1 Agadier ug ingon man ang posibling pagbalhin niini og destino sa maong polis gikan sa Carcar ngadto na dinhi sa dakbayan.
Hinuon giangkon sa mayor nga wala pa niya personal nga mahinabi kabahin niini si Agadier apan kumbinsido siya nga dawaton ang mao niyang tanyag.
Si Agadier una nang mipadayag sa iyang tumang kalipay dihang nahibaw-an niini ang gitanyag nga ganti ug ang pasalig sa mayor nga morekomendar alang sa iyang promosyon.
Si Agadier maoy nakabulilyaso sa pagpanulis unta sa duha ka mga tulisan sa mga pasahero sa Puj diha sa may dalan MJ Cuenco niadtong Domingo ug gani napusilan patay pa niya ang usa ka tulisan nga si Gerry Bayno nga buot untang modunggab kaniya ug nadakpan niini ang kauban nga si Romulo Ligan.