Kini human nasutang grabe ang presensya sa makahilong gas sa sulod human sa hitabo nga gituohang gumikan sa pag-ulbo sa methane gas deposit diha sa carbon mineral sa sulod sa tunnel.
Si Department of Energy 7 regional director Antonio Labios sa pakighinabi sa Banat News mibutyag nga sa gihimong pakisusi nila sa lugar delikado pa alang sa mga rescuers nga manulod sa tunnel sanglit nabuot sa sulod ang makahilong gas.
Nunot niini, gimando ang pagbutang una og duha ka dagkong 'air ducts' kun tube nga maoy subayan sa mga dagkong ventilators ngadto na sa kinailawoman aron mapagawas ang makahilong hangin sa sulod ug diha ipagawas sa gihimo usab nga bangag isip maoy exhaust.
Matud pa ni Labios gawas sa methane duna say presensya sa carbon monoxide, carbon dioxide nga pulos delikado sa makasinghot niini og dugay. Giangkon ni Labios nga walay ekipo ang DOE para sa mga trahedyang susama niini.
Ang mga coal mines ug mga oil rigs ug uban pang matang sa mga instalasyon nga kuhaan og 'source' sa enerhiya nasakop sa DOE. Ang minahan diha sa Dalaguete maoy usa sa mga nagsuplay og coal sa mga planta sa semento ug mga coal powered electric plant sa nasud.
Nunot niini, si Labios nagkanayon nga ilang gipangayuan og tabang ang taga Philippine National Oil Company (PNOC) sa Ormoc City nga makahulam og mine rescue equipment aron mapadayon ang pagluwas sa kun duna pay buhi sa unom ka mga minero diha sa sulod o ba kaha pag-ugkat sa mga patay'ng lawas.
Samtang ang Bureau of Fire Protection 7 regional director nga si Sr.Supt. Anderson Comar mitug-an sa mga tigbalita nga duna silay ipadalang mga bomberong miagig pagbansay-bansay sa rescue and retrieval operations sa mga susamang trahedya apan iya lang kining pasudlon sa tunnel kun makasigurong wala nay makamatay nga hangin diha sa sulod gumikan kay wala silay ekipo nga maggamit nga i-alkontra niini. Matud pa niya nga ang naa nila mao ra ang Self Contained Underwater Breathing Apparatus (SCUBA) ug dili ang para sa mga tunnels.
Giila ang mga nahibiling minero diha sa sulod mao sila si Francisco Ybañez Cataytay, Jaime Mengue Sanchez, Manuel Pagador Lanogan, Antonio Ejercito Jose, Gregorio Guzon Amad ug Nelson Villasis, una nang naugkat ang patay'ng lawas sa mga biktimang sila si Boyet Geraldes ug Henrino Zuniega.