Si Konsehal Sylvan Jakosalem nga maoy Cebu deputy chief de mission mibutyag sa Banat News nga moabot si Presidente Arroyo alas 10 sa buntag diha sa Benito Ebuen Airbase ug modiretso sa Mandaue City.
Matud pa sa konsehal nga mosaksi si Presidente Arroyo sa duwa sa Karatedo sa Mandaue City Sports Complex diin ang mga Pilipino karatekas maoy nag-una sa pagkanlat sa bulawang medalya sa kumite ug kata kagahapon sa naasoy'ng event.
Human mosaksi sa duwa sa Mandaue mobalik ang pangulo sa Benito Ebuen Airbase aron mosakay og helicopter nga magdala kaniya diha sa Danao City diin gipahigayon usab ang mountainbike events nga gisalmutan usab sa mga Pilipino bikers.
Lakip sa kalihukan ni Arroyo sa Danao mao ang pakigkita sa duha ka paresan sa dancesports nga mikanlat sa silver ug gold medals nga sila si Michael Mendoza ug pares niining si Belinda Adora nga parehong mga Sugbuanon gikan sa Team Cebu City Dancesports ug Rico Rosima uban sa iyang pares nga si Filomena Salvador.
Dugang pa ni Jakosalem iyang ipaabot ngadto kang Arroyo ang problemang nasinati karon kalabot niining hotel accommodations sa mga langyaw'ng atleta dinhi sa dakbayan.
Sumala pa nga P2.5 milyones lang ang nahatag isip downpayment sa Philippine Olympic Committee alang sa hotel accomodations sa mga delegado sa ubang nasud nga gikabalak-an ni Jakosalem nga mohatag og dakong problema kun dili mabayran sa husto inig tapos sa SEAGames.
Gibana-bana ni Jakosalem nga magkinahanglan og P10 milyones alang niini ang CebuSoc aron mabayran sa husto ang mga hotel nga nag-accommodate karon sa atletang langyaw.