Apan nadiskubrehang usa diay ka "drama" ang maong pagpanglabni sanglit buot nga solohon sa mastermind ang kolektahonon ngadto sa mga nakautang sa iyang agalon nga si Mercedita Lacaran, taga Wireless Mandaue.
Ang batang 14 anyos (ngan gipugngan) nga maoy milabni ug giingong gisuhulan sa suspek og usa ka libo ka pesos aron signiton ang plastic bag nga iyang(suspek) itunol ngadto kang Lacaran nasikop na usab.
Ang kapolisan midumili una sa pagpabutyag sa pangalan sa suspek sanglit nabalaka ang agalon niini nga dili na unya siya mabayran sa mga tawong nakautang kaniya sanglit nagkantidad man kini og P427 mil.
Sigun pa ni Chief Inspector Arnel Banzon ang hepe sa Carbon Police Station, nahitabo ang pagpanglabni niadtong Lunes sa milabay'ng semana diha gihapon sa Unit 3 Carbon Market.
Nasubay sa kapolisan ang tinuoray nga nahitabo dihang nagsukitsukit ang mga imbestigador sa dapit diin mahitabo ang pagpanglabni ug dihay usa ka tiguwang nga vendor ang nakahatag kanila og impormasyon kalabot sa usa ka fruit vendor ra usab nga nangitag batang masuhulan aron molabni.
Adtong Domingo nasikop sa kapolisan ang maong 14 anyos nga bata ug mao nay mitultol kanila sa suspek.
Giingong ang sulod diay sa maong "plastic bag" dili tinuuray nga kwarta kundili mga pinutol nga mantalaan susama sa gidak-on sa kwarta ug tuyo sa suspek nga malimpyo sa tulubagon kun kini malabni diha na gikan sa mga posesyon ni Lacaran.
Ang Carbon market matud pa ni Banzon sa Banat News maoy labing daghan og mga minor nga mga batang badlungon dinhi sa dakbayan, kadaghanan nalambigit sa pagpanglabni ug paghingos og rugby.