Minneapolis - Humakot si Luka Doncic ng 32 points, 13 assists at 10 rebounds para sa kanyang pang-limang triple-double sa playoffs sa 109-108 paglusot ng Dallas Mavericks sa Minnesota Timberwolves sa Game Two sa Western Conference finals.
Isinalpak ni Doncic ang krusyal na three-point shot sa huling tatlong segundo para sa 2-0 lead ng Mavericks sa kanilang best-of-seven series ng Timberwolves.
“I was just trying to get to my spot and step back. I’m confident in that shot,” sabi ni Doncic sa pagtira niya ng triple matapos takasan si Defensive Player of the Year Rudy Gobert ng Minnesota.
Nagdagdag si Kyrie Irving ng 20 points kung saan ang 13 dito ay iniskor niya sa fourth quarter para sa Dallas.
Umiskor sina centers Daniel Gafford at rookie Derek Lively II ng 16 at 14 points, ayon sa pagkakasunod.
Pinamunuan ni Naz Reid ang Timberwolves sa kanyang 23 points tampok ang pitong tres, ngunit bigong maipasok ang triple sa pagtunog ng final buzzer.