Patay ang isang barangay tanod matapos itong tambangan ng dalawang hindi pa nakikilalang salarin kamakalawa ng gabi sa lungsod ng Malabon.
Nakilala ang nasawi na si Rocky Matias, 39, ng Hulong Duhat ng nabanggit na siyudad, nagtamo ito ng ilang tama ng bala sa iba’t ibang bahagi ng katawan buhat sa hindi pa batid na kalibre ng baril. Mabilis namang tumakas ang hindi pa nakikilalang mga suspek sakay ng isang motorsiklo matapos isagawa ang pamamaril.
Lumalabas sa inisyal na imbestigasyon ng Malabon City Police, naganap ang insidente dakong alas 6:15 ng gabi sa kahabaan ng M. Blas Extension, Brgy. Hulong Duhat, ng naturang siyudad.
Nabatid na habang nakatayo ang biktima ay biglang dumating ang mga suspect at walang sabi-sabi itong pinaulanan ng putok saka mabilis na nagsitakas sakay ng dala nilang motorsiklo.
Inaalam pa rin ng pulisya ang motibo sa isinagawang pagpaslang sa biktima. (Lordeth Bonilla)