Si Agnes matahom ug makabibihag. Mao kana ang hinungdan kun ngano nga daghan ang mga kaliwat ni Adan ang naninguha sa pag-angkon sa iyang pagkababaye. Apan, ang tanan nga nangahas sa paghalad sa ilang gugma ngadto sa maanyag nga tindera wala mohaom sa mga hiyas, kinaiya ug mithi nga iyang gipangita sa usa ka lalaki nga gusto niyang kuyogan diha sa salag sa kaminyoon.
Alang kang Agnes ang pagkaguwapo sa tawo nga manguyab kaniya dili ang hinungdan nga ang naulahi iya na nga sugton. Aron ang lalaki iya nga higugmaon, kinahanglan siya nga tall, dark and handsome. Gawas niini, kinahanglan usab siya nga utokan ug sapian.
Ang lalaki nga naghugpot niining mga butanga dili makaingon nga sobra ra siya ka ambisyosa. Kay usa man siya ka fashion model ug artista kaniadto.
Usa ka adlaw niana, si Agnes daw anaa maglutaw sa kapunawpunawan sa diha nga gihatagan siya sa iyang higala nga si Jolia og numero sa selpon sa tawo nga nihaom sa iyang gipangita.
Pila may estorya, dali ra sila si Agnes ug Fred nga nagkasuod pinaagi sa selpon. Si Fred nakaila ni Jolia sa daklit diha sa usa’g sikat nga mall dinhi sa dakbayan sa Sugbu.
Hangtod nga usa ka adlaw niana, si Fred ug si Agnes nagkasabot nga magkita sa usa ka mahalon nga kan-anan. Ang usa’g usa pulos midayeg sa ilang panagway sa hilom.
"Magpainit una ta Nes," matud ni Fred dayong senyas niini sa silbidora sa paghatag kanila og ilimnon.
Naglangkob sa usa ka baso nga ladies' drink ug usa ka shot sa Chivas Regal. Apan, human sa pipila ka gutlo, si Agnes kalit lang nga nalipong ug gibati og hilabihang katulogon hangtod nga nahinanok gayod siya sa pagkatulog.
Ang nakaparat, kay sa iyang pagmata human sa duha ka oras nga paghinanok mao nalay iyang nasayran nga diha na siya sa usa ka lawak ug walay sapot. Wala na usab niya makita si Fred. Unya si Agnes kalit nga mitimbakuwas ug kusog nga nagbakho.
Iya karon nga napamalandong nga ang iyang pagkababaye hingpit gyud nga nakuha ni Fred gumikan sa iyang pagkamapasagaron. Wala gayod unta siya mohatag og sobra nga pagsalig ngadto sa naulahi aron iya nga kalikayan kining dakong eskandalo sa iyang kinabuhi. (Kataposan)