CEBU, Philippines — Bisan sa teritoryo sa ilang mga karibal, nagpabilin ng kainit ang sa Boston Celtics hinungdan nga ila na sab nga gipahagba ng Dallas Mavericks, 106-99, aron pagkadlit og 3-0 nga bentaha sa best-of-seven NBA Finals kagahapon didto sa American Airlines Center sa Dallas, Texas.
Sila si Jayson Tatum ug Jaylen Brown nagkumbinar og 61 puntos alang sa Celtics, nga nanginahanglan og usa na lang ka daog aron sakmiton ang kampiyonato nga katapusan nilang natagamtaman niadto pang 2008.
Gawas niini, ang Celtics mokulit sab og rekord isip laing daogan nga koponan sa kasaysayan sa NBA uban ang 18 ka korona.
Sa kasamtangan, ilang gisaw-an ang maong dungog sa Los Angeles Lakers bitbit ang tag-17 ka titulo. Ning puntoha, selebrasyon na lang ang kuwang sa Celtics gumikan kay sukad masukad wala pay team nga nakabangon human malubong og 3-0 sa usa ka serye.
Si Tatum mipabuto og 31 puntos samtang si Brown mibubo og 30 puntos uan ang walo ka rebounds ug walo ka assists alang sa Celtics.
Gipayaka sa Celtics ang Mavs bisan og wala si Kristaps Porzingis ning higayona tungod kay nayayay ang walang tiil.
Diriyot hinoon mikolapso ang Celtics human miposte og 19 puntos nga labaw sa sayong bahin a katapusang kuwarter,91-70. Kini tungod kay ang Mavs milusad og nagkayong 22-2 rally aron pagsikit ngadto na lang sa usa ka lugas human sa itsa ni Kyrie Irving sa nahibin nga kuwatro minutos sa aksiyon.
Sila si Tatum, Brown, ug Derrick White mihiusa dayon sa ilang puwersa diin sila mitali sa katapusang 13 puntos sa Celtics aron silyohan ang ikatulo nilang sagunson nga pagpakaging sa Mavs.