CEBU, Philippines — Gitugyan sa Philippine Coast Guard District Central Visayas ngadto sa Cebu Provincial Explosive Ordnance Disposal and Canine (EOD K9) Unit ang mga wala mobuto nga bala o unexploded ordnance (UXO) lakip ang mortar rounds ug rifle grenades nga na-recover gikan sa Dakbayan sa Talisay.
Ang turnover gipahigayon niadtong Martes diha sa Cebu-Cordova Link Expressway (CCLEX) sa South Road Properties, Dakbayan sa Sugbo isip kabahin sa paningkamot sa Coast Guard aron masiguro ang luwas nga pagdumala ug legal nga paglabay sa mga eksplosibong materiyales samtang gipalig-on usab ang koordinasyon sa nagkalain-laing ahensiya alang sa kaluwasan sa publiko.
Gikataho nga usa ka residente sa Dakbayan sa Talisay ang boluntaryong nitugyan unexploded ordnance nga iyang nakit-an atol sa pagkalot diha sa usa ka gibiyaan nga residential property sa Barangay Pooc, sa maong siyudad niadtong Lunes.
Ang Coast Guard nakigkoordinar kini sa Explosive Ordnance Disposal Unit-7 kinsa nagpamatuod nga usa ka wala mobuto nga 60mm mortar round ang nahisgutang nakawtan.
Human sa dokumentasyon ug temporaryong pagtipig sa maong mga eksplosibo pormal kini nga gitugyan sa mga personnel sa Coast Guard District Central Visayas, Special Operations Group-Central Visayas ug Coast Guard Sub-Station Talisay ngadto sa Cebu Provincial EOD K9 Unit.
Lakip sa gitugyan mao ang duha ka 60mm mortar rounds, 13 ka M203 rifle grenades, ug upat ka live booster cartridges nga kaniadto na-recover ug gisiguro sa Coast Guard alang sa hustong pag-ihap ug pag-dispose niini.
Gidayeg ni Rear Admiral Agapito Bibat, commander sa Coast Guard District Central Visayas ang paspas nga responde sa mga personnel sa Coast Guard ug ang pagkamabinantayon sa residente nga nitaho sa unexploded ordnance.
Gipahimangnoan usab sa Coast Guard ang publiko nga dili hikapon, ibalhin o hilabtan ang mga gidudahang unexploded ordnance, military munitions o uban pa’ng eksplosibo kinahanglang i-report dayon kini ngadto sa labing duol nga estasyonan sa Coast Guard, unit sa Philippine National Police, Armed Forces of the Philippines o sa lokal nga pangagamhanan aron ang mga kwalipikadong personnel sa Explosive Ordnance Disposal maoy luwas nga mokuha niini. (BANAT NEWS)