CEBU, Philippines — Nadakpan sa mga operatiba sa PDEA Negros Oriental Provincial Office uban ang RIU-7 NORPIT ug Bais City Police Station ang tulo ka indibidwal ug giguba ang drug den sa buy-bust sa Barangay II, Bais City, Probinsya sa Negros Oriental, Biyernes sa kadlawon.
Nasikop atol sa buy-bust operation ang subject sa operasyon ug drug den manager nga si Jefferson Intan, 55 anyos, job-order watchman sa Bais City Hall, Negros Oriental.
Lakip sa nasikop ang mga tigbisitahan sa drug den nga sila si Rechirs Beloro, 24 anyos ug Reymond Gomez, 29 anyos pulos wala'y trabaho ug nagpuyo sa nahisgutang dapit.
Nakompiskar sa maong operasyon ang upat ka putos sa gituohang shabu nga nitimbang og 6 gramos ug mobalor og P40,800, buy-bust money ug nagkalain-laing drug paraphernalia.
Gipaubos sa tulo ka semana nga case build up ang suspetsado human nakadawat og impormasyon ang mga operatiba nga nalambigit kini sa illegal nga kalihukan.
Maka dispose matud pa og 25 gramos sa gituohang shabu kada semana ang suspetsado nga bag-ong nailhan nga drug personality.
Kasong kalapasan sa Sections 5, 6, 7, 11 ug 12 ang ipasaka batok sa mga suspetsado. (BANAT NEWS)