CEBU, Philippines — Gibalhog sa prisuhan ang habal-habal driver nga giingong pirmeng kulatahon ang iyang inahan kun kini mahubog diha sa Banker 1, Barangay Baring, Lungsod sa Carmen Huwebes sa gabii.
Ang suspetsado mao si Rodieml Guiroy, 34, samtang ang inahan niini nga giingong pirme niyang kulatahon mao si Lourina Guiroy, 56, parehong residente sa maong dapit.
Sa impormasyon nga gihatag sa Carmen Police Station gikan nag-inom kauban sa mga amigo ang suspek. Hubog na kini pagabot sa ilang balay.
Matud pa giandaman kini og pagkaon sa inahan apan samtang nagkaon gikatahong nagsige kini og yawyaw ug giingnan og wala'y pulos ang iyang ginikanan ug uban pang mga sakit nga pulong.
Ang inahan giingong mitubag nga bisan sa ilang kaprobrehon napahuman nila kini og tungha sa high school apan tapulan lang gyud kining mangita og trabaho.
Matud pa wala mohunong ang suspek sa pagsige og yawyaw bisan gibadlong kini sa mga ginikanan.
Ang biktima nga adtong tungora naglaba giduol sa suspek ug gipatiran baba hinungdan sa paghuboy niini ug nahingo ang ngipon.
Wala pa gyud matagbaw giingong gisumbag niini ang inahan maayo nalang nakadagan kini ug gipakgang sab dayon sa mga igsuon ug silingan.
Pagabot sa mga polis, giposasan ang suspek ug nakuhaan kini og duha ka kutsilyo nga gisuksok sa iyang hawak.
Ang suspek pasakaan og kasong slight physical injuries ug kalapasan sa Batas Pambansa Bilang 6 tungod sa pagtago og hait nga hinagiban. IBM (BANATNEWS)