CEBU, Philippines — Gi-awhag sa president ug manager sa Cebu-Cordova Link Expressway CCLEX ang mga moagi sa taytayan nga mokuha na og Radio-frequency identification (RFID). Suma pa ni Engr. Allan Alfon nga padayon nilang gidasig ang mga tawo nga magpa rehistro na sa RFID hinoon wa pa niya ibutyag kun kanus-a ang full implementation na sa paggamit niini.
Nasayran ang paggamit sa RFID gitumong alang sa seguridad ingon man kahatagan og kasayon ang mga motorista nga moagi sa CCLEX.
Gibutyag ni Alfon, sukad gibuksan kini niadtong Abril ning tuiga hangtud karon padayon nga nag improved ang dagan sa trapiko sa maong lugar ilabi nakita sa mga motorista ang kasayon sa ilang biyahe sa pag-agi sa maong bag-o nga bridge.
Kahinumduman gitinguha na unta ang full implementation sa RFID sa CCLEX apan gihatagan lang usa ug higayon ug panahon ang mga biyahedor nga makakuha og RFID. —/MEL (BANAT NEWS)