CEBU, Philippines — Gikatakda nga pasakaan og kasong murder sa kapolisan sa Lungsod sa Compostela ang mga nipatay sa 19-anyos nga lalaki.
Si Police Senior Master Sergeant Julius Tradio sa Compostela Police Station niila sa tulo nga ilang pasakaan og kasong murder karong adlawa nga sila si Mark Ian Duran, 25, John Kenneth Dayon, 21, ug Joy Prince Calo, 26, kinsa nadakpan sa follow-up operation. Ang biktima mao si Josee Ursal III, usa ka habal-habal driver, nga taga Sitio Balibali, Barangay Poblacion sa maong lungsod.
Matud ni Tradio nga gikainom pa sa mga suspek ang biktima hangtud nitumaw ang panaglalis. Pipila sa mga saksi nitug-an sa kapolisan nga giguyod pa sa tulo ka suspek ang biktima ngadto sa labong nga kasagbotan.
Gipasanginlan sa mga suspek ang biktima nga nangawat og manok hinungdan sa ilang panaglalis. Gitug-an sa mga saksi nga si Calo maoy unang nagdunggab sa biktima ug nisunod usab sa pagdunggab ang laing pang duha ka kauban dayong sibat pahilayo.
Si Marlyn Ursal nga inahan sa biktima maoy nagtaho sa buhatan sa kapolisan ug dali kining naghimo sa ilang hot pursuit operation. /GMR (BANATNEWS)