Nagtataka si Hiyasmin kay Dax kung bakit ayaw pa nitong ipaalam kay Nanay Julia na may relasyon na sila. Huwag daw munang ipaalam. Bakit kaya?
Sumang-ayon na lamang si Hiyasmin kay Dax.
Pero kinabukasan, hindi siya nakatiis na hindi iyon sabihin kay Nanay Julia. Kasi, alam din niyang naghihintay si Nanay Julia ng balita ukol sa kanilang dalawa. Hindi niya matitiis ang matanda lalo pa’t ito ang may gustong magkatuluyan sila ni Dax. Botong-boto sa kanya ang matanda. At sa pagkagusto nga nito sa kanya, sinabihan siya na “gumawa ng hakbang” kay Dax. Siya na raw ang mag-“first move”.
Nilapitan niya si Nanay Julia na noon ay nagluluto ng almusal.
“May good news ako sa’yo Nanay,’’ sabi niya at inakbayan ito.
“Ano yun, Hiyasmin?’’
“Mag-on na po kami ni Dax, Nanay!”
Hindi agad nakapagsalita si Nanay at nakatingin lang kay Hiyasmin.
Makaraan ang ilang sandali, buong higpit na niyakap nito si Hiyasmin.
“Salamat at nagkaunawaan din kayo, Hiyasmin. Masayang-masaya ako,’’ sabi nito na gumagaralgal ang boses.
“Kagabi po kami nagkaunawaan. Nagtungo siya sa room ko.’’
“Oo. Nakita ko ang pagpasok niya. Lingid sa kanya, nakamasid ako.’’
Gustong humalakhak ni Hiyasmin. Walang kamalay-malay si Dax na alam nang lahat ni Nanay Julia ang “lihim”.
(Itutuloy)