Duha ka Gwen Garcia

Kon apil ka sa naglibog sa sinultihan ug binuhatan ni outgoing Governor Gwen Garcia human napilde sa eleksiyon sa Mayo 12, niay posibleng katin-awan. Sa mga diskurso dayong tapos sa iyang termino, nabisto ang seryusong bugno sa panghunahuna ni Garcia:

Usa ka bahin niya, nga nahibawo unsay angay ug dili angayng himuon sa mga opisyal sa gobyerno, kusganong niawhag nga serbisyohan ang interes sa katawhan ug likayan ang paggamit sa puwesto para sa hakog nga mga interes; pero

Nidaog ang laing bahin nga nagtuong siya ra ang nahibawo unsay makaayo sa katawhan.

Maong usa ka bahin niya nahibawo nga ang mga proyekto nga makahatag sa labing dakong kaayuhan ngadto sa labing daghan, apil na ang mga gipasiugdahan sa iyang politikanhong mga kaatbang, maoy angayng ipatuman.

Pero laing bahin niya maoy nipatigbabaw: Gilaslasan niya ang budget ug gitaktak ang mga doktor, nurses ug ubang healthcare workers aron pagpanimawos nilang kanhi gobernador Junjun Davide ug kanhi bise gobernador Agnes Magpale. Nga nakadawat og daghang pasidungog tungod sa malampuson nilang pagpalambo sa mga serbisyo sa provincial hospitals.

Maong usa ka bahin niya kumbinsido nga ang mga opisyal sa gobyerno angayng magtuon ug magmatinud-anon sa ilang trabaho sa pagpanalipod sa katawhan atol sa dagkong katalagman ug pagtagbaw sa labing batakan ug dinalian nilang mga panginahanglan.

Pero ang laing bahin maoy iyang gituohan: Nagpatuyang pagbutang sa iyang ngalan ug nawong sa mga proyekto nga dili iyang kuwarta maoy gigasto, siyay kinadaghanan og OOTD sa TikTok ug niinsistir nga maoy numero unong gobernador sa Pilipinas ug gipamugos ang Suroy Suroy Sugbo ug Pasigarbo sa Sugbo nga nasentro niya, dili sa Sugbo.

Maong iyang mga diskurso niawhag nga paminawon ang mga Sugbuanon kay silay tinuod nga hawod sa Sugbo ug ang ilang tingog maoy tingog sa Ginoo. Pero wala siya motahud sa tingog sa kapin sa 1.1 milyones ka mga botante nga nibasura niya ug nipili ni Pam Baricuatro.

Maong samtang nipadayag og kahinangop nga mahimo nang pribadong indibiduwal karong Hunyo 30, human sa 21 ka tuig nga pagka gobernador ug pagka kongresista, niinsistir nga magpabilin sa puwesto pinaagi sa pagpasaka og disqualification case ug election protest batok ni Baricuatro.