Paukyab rang imbestigasyon?
Gikondenar na sa mga sakop sa Committee on Good Government sa House of Representatives si Bise Presidente Sara Duterte nga kawatan ug angayng pasakaan og kasong plunder. Pero mayoriya nila nihimakak og koneksiyon sa bisan unsang plano sa impeachment.
Wala lihoka nilang House Speaker Martin Romualdez ug iyang mga alyado ang duha ka impeachment complaints nga napasaka duha ka semana nang nilabay. Nagbalikbalik hinuon pagpaluyo sa baruganan ni Presidente Ferdinand Marcos Jr. nga dili makaayo sa nasud ang impeachment sa bise presidente. Nagpasabot bang wala motuo sa ilang kaugalingong mga ebidensiya?
***
Gitulisok sa mga sakop sa House Quad Committee si kanhi presidente Rodrigo Duterte nga mao ang nawong sa mga sindikato sa labing bangis nga mga krimen sa extrajudicial killings, ilegal nga drugas, ug Philippine Offshore Gaming Operators.
Pero bisan sa mga ebidensiya nga ilang nahipos ug bisan sa mga kumpisal sa kanhi presidente, wala mag-apura sa pagrekomendar sa pagpasaka og mga kaso. Nagpaabot ba sa International Criminal Court nga ilang gipasidan-an nga dili tabangan? O wala g’yuy tinguha sa paghatag og hustisya sa mga biktima sa mga krimen?
***
Ang atras-abante sa administrasyon maoy nakapatumaw sa mga pagduda nga ang kalamposan sa mga imbestigasyon sa House sa pagdani sa atensiyon sa kinabag-an sa katawhan ilang gigamit sa:
•Pagpahilom sa kinabag-an sa ilang pagsurikbot sa ?89.9 bilyones sa kuwarta sa Philippine Health Insurance Corp. nga ubos sa balaod magamit lang sa pagpalapad sa mga benepisyo ug pagmenos sa bayranan sa mga sakop sa PhilHealth;
***
•Paglingaw sa mga magbubuhis aron nga dili mohatag og importansiya sa pagbasura sa mga kongresista ug mga senador sa balaod, nga sila ra sab ang nagpasar, nga dunay bahin ang PhilHealth sa koleksiyon sa sin taxes ug sa kita sa Philippine Amusement and Gaming Corp. ug Philippine Charity Sweepstakes Office; ug
•Paglipat sa mga botante sa laing kalapasan sa Kongreso --ning higayona batok na g’yud sa 1987 Constitution nga nagsugo nga ang edukasyon maoy makadawat sa kinadak-ang bahin sa tinuig nga budget-- pinaagi sa paglaslas sa budget sa Department of Education ngadto sa ?737 bilyones ug pagpaburot sa budget sa Department of Public Works and Highways ngadto sa ?1.1 trilyones.
- Latest
