Pagsutoy sa impeachment

Nagsaulog nang daan ang mga dumadapig ni Bise Presidente Sara Duterte. Para nila hanap nang daan ang kahigayonan nga makonbikto si Duterte sa Senado, kon ma-impeach siya sa House of Representatives. Mas naklaro pa g’yung iyang kadaogan tungod sa pagdeklarar sa Iglesia ni Cristo (INC) sa ilang pagsupak sa impeachment.

Maong ilang gipasidan-an ang mga senador, labi nang mga magpapili pagbalik sa ilang puwesto karong Mayo 12, 2025: Politikanhong paghikog ang pagpangahas sa pagpalagpot ni Duterte nga, gibalikbalik nilag pahinumdom, nakakuha og 32 milyones ka boto sa eleksiyon sa 2022.

* * *

Ang hingtungdan nga mga senador makadawat sa naandang tubag sa ilang mga magtatambag: Dili ingon ana kadaghan ang rehistradong mga botante nga mga sakop sa INC; pero dili sab makatabang kon direkta silang banggaon.

Mas mapuslanon ang leksiyon sa kasaysayan. 23 ka tuig ang nilabay, may mga gikuyawan sab nga nagpapili pagka senador. Kay nisukwahi sila sa baruganan sa kadagkoan sa ICC. Nidaog ang mayoriya nila. Ipasalig nako sa mga Duterte ug Marcos supporters nga dili ni fake news. Mahimong ma-verify pinaagi sa pag-Google sa “2001 Philippine Senate election.”

* * *

Bisan sa popularidad ni kanhi presidente Joseph Estrada nga bag-ong gipalagpot sa Edsa 2 sa Enero 20, 2001, ug bisan sa suporta sa INC pagpabalik niya sa gahom pinaagi sa Edsa 3 sa Mayo 1, 2001, nanghawod ang iyang mga kaatbang sa eleksiyon sa Mayo 14, 2001:

• Walo ang nidaog sa iyang kaatbang nga People Power Coalition: Juan Flavier, Serge Osmeña, Franklin Drilon, Joker Arroyo, Ramon Magsaysay Jr., Manny Villar, Francis Pangilinan, ug Ralph Recto; ug

• Upat ray nidaog sa iyang Puwersa ng Masa: Edgardo Angara, Panfilo Lacson, Loi Ejercito, ug Gregorio Honasan.

* * *

Sa laktod pagkasulti, ang impeachment ni Duterte mag-agad sa administrasyon. Kon sigaan sa mata ang mga kongresista ug mga senador dungan sa pag-abli sa gripo sa kuwarta:

• Mosutoy ang impeachment sa House nga dili na moagi sa husay sa House Justice Committee; ug

• Masugdan dayon sunod buwan ang impeachment trial aron pagkonbikto ni Duterte (nga kon makumbinser dili kakuha sa walo ka boto pag-absuwelto niya mas molaktod sa proseso pinaagi sa pag-resign aron makadagan pa sa pagka presidente sa 2028).