Nasugba sa baga
Kon nagtuo si Bise Presidente Sara Duterte Carpio nga malipat ang publiko sa iyang pagbakasyon sa Germany samtang gibahaan ang Metro Manila atol sa pagkusukuso sa super typhoon Carina ug habagat sa niaging buwan pinaagi sa pagreklamo sa pagkuha sa iyang guwardiyang mga polis, puwerte niyang sayopa.
Human sa bastos niyang suwat ni Police General Rommel Francisco Marbil, hepe sa Philippine National Police, nabisto nga 75 ka guwardiya ang gikuha pero kapin sa 400 pay nahibilin ug nga mas daghan pa siya og guwardiya kay ni Presidente Ferdinand Marcos Jr.
* * *
Naigo siya sa pasidaan sa atong katiguwangan: Kon molikay sa kayo mahimong matugpa sa baga. Mas lawom tinuod nga gahong ang iyang nahulgan tungod sa lipat-lipat kay sa pagkumpisal tinuod bang gipalabi niyang konsiyerto ni Taylor Swift sa Munich kay sa pag-unong sa mga biktima sa katalagman.
Nakakita hinuon og buslot ang mga turutot sa Malakanyang, nga klarong gisugo sa palasyo pagsugod og bunal sa iyang kahilas, sa pagbisto nga kapin sa P500 milyones ang gasto sa gobyerno para sa seguridad sa bise presidente sa niaging duha ka tuig.
* * *
Nganong gipatuyangan man si Carpio pagtapok og usa ka batalyon nga guwardiya? Mubo nga tubag: Premyo sa kadaogan sa UniTeam ang paghatag sa tanan niyang gipangayo.
Karong nabuak nang ilang alyansa, mahunong na ang mga ulug-ulog. Mga pagsaway nilang Justice Secretary Boying Remulla ug Presidential Adviser Larry Gadon ug pagbisto sa kapolisan ug Armadong Kusog nga way hulga batok ni Carpio pasiuna lang nga mga timaan nga ibanan nang iyang mga guwardiya.
* * *
Mahimo ganing isunod ang paglaslas sa Kongreso sa iyang gipangayo nga kapin sa P2 bilyones nga budget sa Office of the Vice President sa 2025 ug ipareha na lang sa mumho nga gipisik sa iyang amahan nga si kanhi Presidente Rodrigo Duterte ngadto ni kanhi Bise Presidente Leni Robredo.
Posible hinuon nga nahibawo nang daan ang mga Duterte sa umaabot. Maong nagpaluuy-luoy nang daan sa nag-ung-ong nga mga pagpanggukod sa administrasyon. Pero imbes mo-simpatiya nila, mahimong mo-abiba hinuon ang katawhan. Kon moabot nang adlaw sa panudya sa gipasangil nga pangabuso sa gahom, pangurakot sa mga transaksiyon ug laktod nga pinatyanay.
- Latest
